Penitensiar xidmət əməkdaşlarına xarici təcrübə çatdırılıb

28 dekabr 2016-cı il tarixində “Uluçay” Sosial-İqtisadi İnnovasiya Mərkəzi tərəfindən Şəki Penitensiar Xidmətinin əməkdaşları üçün “Cəzaçəkmə müəssisələrinin idarə edilməsi – xarici ölkələrin təcrübəsi” mövzusunda təlim təşkil edilmişdir. Təlim “Uluçay” Sosial-İqtisadi İnnovasiya Mərkəzinin təşəbbüsü ilə BMT İnkişaf Proqramının dəstəyi ilə Avropa İttifaqı tərəfindən maliyyələşdirilən “Əhalinin həssas təbəqələrinin sosial-iqtisadi hüquqlarının təmin edilməsində vətəndaş cəmiyyətinin daha böyük rol oynamasına imkan yaradılması” layihəsi çərçivəsində təşkil olunub. Təlim İqtisadi və Sosial İnkişaf Mərkəzinin sədri Vüqar Bayramov tərəfindən aparılıb.

Təlimin əsas məqsədi xarici ölkələrdəki cəzaçəkmə müəssisələrinin idarə edilməsi ilə bağlı ətraflı məlumat vermək və ən yaxşı və müvafiq təcrübəni Şəki Penitensiar Xidmətinin işinə inteqrasiya etmək olub. Təlim zamanı təlimçi Norveç, Almaniya, ABŞ, Yaponiya, Hollandiya və digər Avropa ölkələrindən həbsxanaların idarə olunması ilə bağlı məlumat və təqdimatla çıxış etmişdir. Hər bir ölkənin təcrübəsi ətrafında aparılan müzakirələr iştirakçılar arasında fəal müzakirə olunub və iştirakçıların sualları əsasında müvafiq əlavə məlumatlar verilib.

Şəki Penitensiar Xidmətinin rəis müavini Mazam Mustafayev qeyd edib ki, təlim bütün iştirakçılar üçün yeni imkanlar və təcrübələr öyrənmək baxımından zəruridir və bu, Şəki Penitensiar Xidmətinin gələcək fəaliyyəti çərçivəsində nəzərdən keçirilə bilər.

İqtisadi və Sosial İnkişaf Mərkəzi (İSİM) və Ədliyyə Nazirliyinin Şəki Regional İdarəsi layihənin tərəfdaşıdır.